Strč prst skrz krk

Lokafærsla

2007-03-11T13:06:00.000Z

Er ekki hættur að blogga en hef fært mig um set. Kominn með síðu á Wordpress, hér. Kæru lesendur, þeir ykkar sem eru með hlekk á mig, ég yrði mjög glaður ef þið væruð til í að uppfæra hjá ykkur :-)

Nóg komið

2007-03-07T22:18:00.000Z

af ferðasögum í bili.

Í gær hjólaði ég í fyrsta skipti á þessu ári í vinnuna. Var kominn svolítið áleiðis þegar ég áttaði mig á því að það var smá hálka sums staðar. Var þá kominn of langt til að snúa við. Hjólaði bara mjög rólega það sem eftir var leiðarinnar. Komst án áfalla á leiðarenda.

Stefnan er svo að halda þessu áfram og reyna að gera eins og í fyrra. Hjóla í vinnuna svona 2-4 sinnum í viku.

Enn

2007-03-07T00:03:00.000Z

um ferðina.

Barinn á Hótel Kea skoraði mörg stig hjá okkur um helgina. Kíktum þar inn á laugardagskvöldið og af rælni spurðum við hvort þar væri hægt að fá McAllan viskí. Bjuggumst ekkert frekar við því. Heyrðu, þá áttu þeir til 6 eða 7 mismunandi tegundir af því! Heil hilla á barnum bara undir McAllan. Þokkalega flott. Við fengum okkur það næstelsta sem var til eða 25 ára. Flauelsmjúkt.

Akureyri

2007-03-05T22:52:00.000Z

Stundum kemur það sér vel að ganga með vasahníf. Íbúðin, sem við vorum með var mjög sparlega búin tækjum og tólum (nema glösum). Það var til dæmis enginn upptakari, lélegur tappatogari og enginn beittur hnífur. Swiss army knife reddaði öllu þessu. Er verið að passa upp á að maður drekki ekki frá sér ráð og rænu eða fari sér að voða? ;-)

Já og svo þurfum við að muna að skila lyklinum...

2007-03-05T22:19:00.000Z

Við hjónakornin skruppum í skotferð norður til Akureyrar eins og sjá má t.d. hér.

Á leiðinni norður þá gerðist það fjórum sinnum að Lexusbílar tóku fram úr okkur. Fyrst nálægt Borgarnesi síðan einhvers staðar á Holtavörðuheiðinni og í þriðja skipti í Vatnsskarðinu. Í sjálfu sér ekki merkilegt nema að í fyrsta og tvö síðastu skiptin var um sama bílinn að ræða. Hann hefur sjálfsagt stoppað einhvers staðar til að næra sig. Við aftur á móti vorum með nesti og stoppuðum mjög stutt.

Í fyrstu tvö skiptin, var Lexusinn horfinn eftir smá stund. Við hugsuðum ekki meira um þetta þangað til við sáum blá blikkandi ljós í Skagafirðinum, rétt áður en var lagt á Öxnadalsheiði. Ég sagði þá við Hildigunni: „Ætli þetta sé ekki Lexusinn, sem er búinn að æða fram úr okkur.“ Og mikið rétt, það var hann. Við gátum ekki gert að því að glotta svolítið að þessu.

Á miðri Öxnadalsheiðinni tók hann svo fram úr okkur í þriðja skipti. En það var samt ekki eins mikið span á honum og í fyrri tvö skipin.

Lengsta

2007-02-23T00:41:00.000Z

bloggpása ársins framundan. Var að átta mig á því að næsti bloggdagur er ekki fyrr en eftir 6 daga. Næsta lífsmark verður því ekki fyrr en 2. mars í fyrsta lagi. L8rs ppl.

Búinn

2007-02-23T00:31:00.000Z

að komast að því líka að Skrabbl er leiðinlegur leikur. Hildigunnur var að enda við að bursta mig. Grrr. Ég sem þoli ekki að tapa...

Maraþonmatreiðsla

2007-02-18T22:10:00.000Z

Eldaði og bakaði þvílík ósköp í dag. Hildigunnur var í upptökum og ég þurfti því að sjá um matseldina. Vorum með í kvöldmat ítalskan rétt, sem er alveg hrikalega góður. Uppskriftin er hér. Þetta er alls ekki flókinn réttur en það þarf að byrja tímanlega á honum því hann þarf að malla í 2 tíma og svo er smá undirbúningur sem þarf að fara fram áður (kannski svona þrjú korter eða svo). Hann er hins vegar alveg pottþétt fyrirhafnarinnar virði.

Gítarpastanu var svo skolað niður með:

Þar að auki varð ekki komist hjá að baka einn skammt af vatnsdeigsbollum. Ekki séns að krakkarnir slepptu manni við það. Síðan gerði ég jógúrt (reyndar ekki mikið mál).

Á tímabili var ég með bollur í ofninum, jógúrt að kólna og að undirbúa gítarpastað. Svona til að kóróna þetta allt saman skellti ég svo í eina berjaböku.

Það kemur þessu ekkert við að það var konudagurinn í dag.

14-2

2007-02-13T22:48:00.000Z

Fótbolti er leiðinleg íþrótt.

Komst að því í kvöld þegar liðið mitt lenti 14-2 undir. Endatölurnar 24-17. Grrr...

Ekkert tapsár. Neiii.

Fávitar

2007-02-11T22:32:00.000Z

Við hjónin sáum eitt fáránlegt atvik á leiðinni heim af tónleikum áðan.

Við biðum á ljósunum á Hringbraut, Framnesvegi og Álagranda. Sáum þá að það var bíll með blá blikkandi ljós (kom svo í ljós að þetta var lögreglubíll) að koma á móti okkur. Þegar hann var alveg að koma að ljósunum kemur einn bíll af Álagranda og beygir inn á Hringbraut til vesturs þvert í veg fyrir lögreglubílinn þannig að hann þurfti að negla niður. Ekki nóg með það þá voru 2 gangandi vegfarendur, sem biðu eftir því að komast yfir Hringbrautina, sem héldu þá að lögreglan væri að hleypa þeim eða ég veit ekki hvað og óðu yfir þvert fyrir bíl í forgangsakstri.

Er það furða þótt hann hafi skellt á sírenunum?

Einokun

2007-02-07T22:21:00.000Z

Og svo var það fréttin um að Frumherji væri að kaupa Aðalskoðun. Ég bara trúi því ekki að þetta verði látið ganga í gegn. Ef kaupin verða leyfð verður eitt fyrirtæki, sem sér um nánast alla skoðunarstarfsemi á landinu. Er það betri einokun en ef ríkið sæi um þetta? Held ekki.

Misrétti í flugi

2007-02-07T22:17:00.000Z

Missti andlitið í gær þegar ég heyrði frétt þess efnis að matseðillinn hjá Flugleiðum væri stéttskiptur. Flugmennirnir fengju annan mat heldur en flugfreyjur og þjónar. Nú skilst mér að flugmennirnir fái mismunandi mat. Ég skil alveg ástæðuna fyrir því, minni hætta á matareitrun. En að setja flugmennina á einhvern svona stall finnst mér fáránlegt!

Matarboð

2007-02-03T23:23:00.000Z

Vorum 3, ég, Hildigunnur og Freyja í matarboði í einum af matarklúbbunum okkar áðan. Þetta var mjög skemmtilegt kvöld. Maturinn góður, þarf náttúrlega ekki að spyrja að því og félagsskapurinn ekki síðri. Takk fyrir okkur.

Undarleg jurt

2007-02-02T23:26:00.001Z

DSC00162, originally uploaded by dick_pountain.

Er bara að prófa að blogga úr Flickr. Veit annars ekki hvar í ósköpunum svona lagað vex...

Grey bankastjórinn

2007-01-31T22:03:00.000Z

Það lítur víst út fyrir að Wolfowitz hafi ekki efni á því að kaupa sér sokka sbr. þetta eða þá að hann er bannsettur sóði.

Myrkir músikdagar

2007-01-29T22:34:00.000Z

Ég náði í kvöld þeim áfanga að hafa farið á fleiri tónleika heldur en Hildigunnur á Myrkum músikdögum (tónlistarhátíð tónskáldafélagsins).

Ok, ok hún var að syngja á tónleikunum áðan þ.a. strangt til tekið fór hún ekki á tónleikana. Var reyndar á þeim. Veit, hártoganir...

Tækjaraunir

2007-01-23T22:38:00.000Z

Það er ekkert smá, sem að rafmagnstækin okkar gefa upp öndina þessa dagana. Við endurnýjuðum tölvuna, Dvd spilarann og ísskápinn. Gamla tölvan orðinn óttalegur ræfill, ísskápurinn líka og Dvd spilarinn af tæknilegum ástæðum.

Haldið þið ekki að brauðristin okkar hafi ekki tekið upp á því að geispa golunni líka nú um helgina. Er satt að segja búinn að fá nóg af þessu. Eins gott að önnur tæki haldi sig á mottunni í bili.

Góðkunningi lögreglunnar?

2007-01-23T18:15:00.000Z

Lenti í smá útistöðum við lögregluna í gær. Ég var á leiðinni heim og þurfti aðeins að skjótast inn. Að sjálfsögðu voru engin stæði laus í grenndinni þ.a. ég gerði bara það sem maður gerir venjulega í slíku tilviki. Stoppaði uppi á gangstétt og hoppaði út úr bílnum. Það sem ég hafði ekki tekið eftir var að næst á eftir mér var lögreglubíll. Ég stoppaði til að hleypa honum framhjá. Hann stoppaði líka. Ég beið smá stund. Hann beið smá stund líka. Svo skrúfaði bílstjórinn niður rúðunni en sagði ekki neitt. Ég beið ennþá og sagði ekki neitt. Þá sagði löggi: „Einhverjar málsbætur?“ Ég byrjaði að stama eitthvað. Ja... ég... hm... allt í lagi ég skal færa bílinn.

Svo í dag hafði lögreglan á Selfossi samband við mig. Það var nú reyndar bara gamall bekkjarfélagi að óska mér til hamingju með afmælið.

Spurning hvað gerist á morgun?

Nýja tölvan

2007-01-19T19:23:00.000Z

Ég veit að Hildigunnur er búin að monta sig af nýju vélinni okkar. Ég verð bara að gera það líka. Hér er græjan.

Fyrst maður er byrjaður

2007-01-19T19:20:00.000Z

Fékk þetta sent í vinnunni í dag.

It's not too often that you hear a joke about blonde guys...

Two blonde guys were working for the city works department. One would dig a hole and the other would follow behind him and fill the hole in. They worked up one side of the street, then down the other, then moved on to the next street, working furiously all day without rest, one guy digging a hole, the other guy filling it in again.

An onlooker was amazed at their hard work, but couldn't understand what they were doing. So he asked the hole digger,

"I'm impressed by the effort you two are putting in to your work, but I don't get it-why do you dig a hole, only to have your partner follow behind and fill it up again?"

The hole digger wiped his brow and sighed, "Well, I suppose it probably looks odd because we're normally a three-man team. But today the guy who plants the trees called in sick."

Af hverju

2007-01-19T19:13:00.000Z

ætli Mogginn segi alltaf frá því að Essó hafi lækkað bensínverð, þegar olíufyrirtækin lækka hjá sér? Ég minntist á þetta við Hildigunni síðast þegar bensín lækkaði. Og nú í dag lækkuðu olíufélögin verðið hjá sér. Bara minnst á Essó. Stundum kemur önnur frétt þar sem sagt er að Olís og Skeljungur hafi líka lækkað verð. Kemur varla fyrir að minnst sé á Atlantsolíu.

Bæ ðe vei, hvað ætli bensínið myndi kosta hér núna ef Atlantsolía hefði ekki komið til?

Sumarleyfið

2007-01-17T23:14:00.000Z

Að öllum líkindum erum við búin að ákveða hvert við förum í sumarfríinu. Veltur þó á því hvort húsið, sem við höfum augastað á er laust.
Meira síðar en við erum farin að hlakka til...

Dvd

2007-01-13T18:04:00.000Z

Vorum að kaupa nýjan Dvd spilara. Það kom nú reyndar ekki til af góðu. Gamli spilarinn okkar, sem við keyptum fyrir 4 eða 5 árum spilar ekki diska nema af svæði 2. Þessa dagana erum við að horfa á 2 sjónvarpsseríur (House og Grey's anatomy) á diskum, sem eru af svæði 1. Við höfum fram að þessu horft á þetta í tölvunni en það er vesen. Miklu þægilegra að horfa í sjónvarpinu.

Þegar við keyptum gamla spilarann spurðum við að sjálfsögðu að því hvort hann spilaði ekki öll svæði. Jú, jú, jú var svarið hjá sölumanninum. Á mörgum svona spilurum er hægt að virkja öll svæði þó þeir séu gefnir upp fyrir að spila bara svæði 2 svo dæmi sé tekið. Ekki á þessum. Við fundum einhverja síðu þar sem gefin var upp aðferð til að virkja öll svæði á þessum spilara. En það virkaði að sjálfsögðu ekki. Keyptum svo aðgang að einhverri síðu þar sem átti að vera lausn á vandamálinu. Kom í ljós að það var bara sami kóðinn og við höfðum fundið annars staðar og virkaði ekki. Grrrr.....

Þannig að við skelltum okkur í Sjónvarpsmiðstöðina í dag og keyptum nýjan spilara. 10.000 kall fyrir spilara, sem spilar öll svæði. Ekki slæmt. Þegar ég ætlaði svo að tengja spilarann þá kom í ljós að hann var ekki með SCART tengi (erum ekki með plasma eða LCD sjónvarp). Þannig að ég þurfti að fara smá krókaleiðir til að tengja spilarann. Hafðist að lokum þ.a. á eftir horfum við í sjónvarpinu. Jibbí.

Affrysting

2007-01-11T21:28:00.000Z

Var að enda við að affrysta ísskápinn. Vonandi í síðasta skipti sem þarf að gera það við þennan. Ef allt gengur upp fáum við nýja skápinn eftir 2 vikur eða svo.

Undanfarið ár eða svo hefur þurft að affrysta skrambans ísskápinn á svona mánaðar til eins og hálfs mánaðar fresti. Ekki það skemmtilegasta sem maður gerir.

Sýning

2007-01-07T14:36:00.000Z

Fór með stelpurnar á frönsku sýninguna í Listasafni Íslands. Skemmtileg sýning. En samt þvílíkt sölutrikk að segja að þarna séu Matisse, Renoir og Kokoschka. Held að það hafi verið alls 5 Matisse myndir, 2 Renoir og 1 Kokoschka.
Sýningin er í 3 sölum og 1 salur er lagður undir málara, Albert Marquet, sem ég hafði hvorki heyrt um né séð neitt eftir áður. Féll alveg fyrir myndunum hans. Stelpurnar voru líka mjög hrifnar. Mæli með því að kíkja á þessa sýningu.

Finnur

2007-01-05T20:15:00.000Z

er góður. Áðan þegar við kölluðum á hann að borða þá sagði hann, þegar hann sá matinn: „Namm þetta er uppáhaldsmaturinn minn. Hvað er þetta annars?“

Nokkuð góður.

E.s. Þetta er víst 200. færslan mín. Næ ekki Hildigunni en kannski ekki svo slæmt miðað við að blogga bara 3. hvern dag að meðaltali.

Viðskiptapartý

2007-01-05T19:38:00.000Z

Var í alveg geðveiku viðskiptapartýi. Af einhverjum ástæðum buðu Hugur-Ax okkur hjá Samskipum í nýárs og búferlateiti sitt. Þokkalega flott. Smjör flaut af hverju strái. Eina sem ég get kvartað yfir var að í boðskortinu var talað um lifandi tónlist, léttar veitingar, skemmtiatriði og flugeldasýningu. Lifandi tónlist, veitingar og flugeldasýning var þarna en eina „skemmtiatriðið“ var Vilhjálmur Vilhjálmsson borgarstjóri með ræðu! Ég flokka það ekki undir skemmtiatriði.

wulffmorgenthaler

2007-01-03T23:21:00.000Z

er (næstum því) alltaf góður. Sikk, samt.

2006-12-31T17:54:00.000Z

Gleðilegt nýtt ár
kæru lesendur.

Undirbúningur

2006-12-31T17:49:00.000Z

undir áramótaboðið gengur bara vel. Eigum von á báðum fjölskyldunum í mat. Verða líklega 20-21 manns. 8 kg kalkúni inni í ofni. Búinn að vera þar í næstum 3 tíma. Á annað eins eftir. Eina sem við þurfum að gera núna er að pensla hann reglulega og svo leggja á borð. Hallveig og tengdó hjálpa til með meðlætið. Þurfum svo að fá lánað bæði stóla og hnífapör.

Ekkert rosalegt stress.

Grey's Anatomy

2006-12-29T23:13:00.000Z

Frí í vinnunni í dag, gekt! Undirbúningur fyrir stóra áramótaboðið í gangi, risakalkúnn kominn í afþíðingu, delegation af meðlæti í tengdafjölskylduna (hmmm, hvers vegna bað ég ekki mömmu? Kannski vegna þess að Hildigunnur var á undan).

Svo erum við að horfa á Grey's Anatomy og getum ekki hætt. Fjórði þáttur í kvöld...

2006-12-23T21:14:00.001Z

Gleðileg jól

Námskeiðið

2006-12-19T23:41:00.000Z

Forritunarnámskeiðið sem ég er búinn að vera á í allt haust er að verða búið. Loksins. Síðasti tími á morgun. Get ekki sagt að einbeitingin sé búin að vera mikil núna í desember.

100%

2006-12-17T22:30:00.000Z

Fékk þetta sent í vinnunni. Nokkuð gott

What Makes 100%? What does it mean to give MORE than 100%? Ever wonder about those people who say they are giving more than 100%? We have all been to those meetings where someone wants you to give over 100%. How about achieving 103%? What makes up 100% in life?

Here's a little mathematical formula that might help you answer these questions:

If:
A B C D E F G H I J K L ! M N O P Q R S T U V W X Y Z is represented as:
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26.

Then:

H-A-R-D-W-O-R-K
8+1+18+4+23+15+18+11 = 98%

and

K-N-O-W-L-E-D-G-E
11+14+15+23+12+5+4+7+5 = 96%

But,

A-T-T-I-T-U-D-E
1+20+20+9+20+21+4+5 = 100%

And,

B-U-L-L-S-H-I-T!
2+21+12+12+19+8+9+20 = 103%

AND, look how far ass kissing will take you.

A-S-S-K-I-S-S-I-N-G
1+19+19+11+9+19+19+9+14+7 = 118%

So, one can conclude with mathematical certainty that WhileHard work and Knowledge will get you close, and Attitude willget you there, it's the Bullshit and Ass kissing that will put you over the top.

The julekalender

2006-12-13T22:09:00.000Z

Erum að endurnýja kynnin við þessa frábæru seríu. Danskt jóladagatal frá því við vorum úti í Danmörku. Okkur hefur meira að segja tekist að plata unglinginn á heimilinu með í glápið. Nú er hún orðinn aðalaðdáandi þáttanna.

Verst að hún lærir ekki svo mikla dönsku af þeim, því eina danskan sem heyrist er í útvarpinu og í sögumanninum. Afgangurinn er jóska, kaupmannahafnska og einhver undarleg blanda af dönsku, ensku og þýsku.

Já bjórsmakkið

2006-12-11T21:57:00.000Z

Hildigunnur var nánast búin að lofa að ég myndi tjá mig eitthvað um bjórsmakkið, sem við fórum í hjá Kalla sl. föstudag. Þannig að nú er best að láta verða af því.

Þetta er í fyrsta sinn sem við förum í bjórsmakk. Þannig að maður vissi ekki alveg við hverju mætti búast. Smökkunin hófst á Hoegaarden hveitibjór og Franziskaner sem er líka hveitibjór. Við Hildigunnur höfðum ekki smakkað hveitibjór í áreiðanlega 15 ár og þótti hvorugu góður þá. Á þessum 15 árum hefur smekkurinn greinilega breyst. Ég segi nú ekki að maður fari að hlaupa út í ríki eftir honum en það mátti vel skola honum niður.

Því næst var prófaður Duvel, belgískur bjór sem er 8,5%! Samt ekki hægt að finna það á bragðinu. Þetta er ljós bjór en samt ekki pilsner týpa. Mjög góður. Þessu næst komu tveir bjórar frá Samuel Adams í Boston. Sá fyrri var lager, fínn frá þessu trausta brugghúsi. Sá síðari var svo winterlager, mun fyllri og betri bjór.

Þá var röðin komin að fallbyssunum. Dreginn var upp Orval, sem er belgískur Trappistabjór. Miklar seremóníur þarf til að hella þessum bjór í glösin því helst ekkert af botnfallinu má fara með. Ég hafði ekki smakkað bjór af þessu tagi í álíka langan tíma og hveitibjóra. Hafði ekki kunnað við bragðið þá en bragðlaukarnir hafa greinilega þroskast. Mér fannst Orval a.m.k. mjög fínn núna. Svo til samanburðar dró Kalli upp Orval sem hann var búinn að geyma í ár. Ótrúlegur munur á „sama“ bjórnum. Þessi var ef eitthvað var enn betri.

Að lokum var dregin fram enn önnur kanóna en það var Chimay 2003 ef ég man rétt. Ég hefði ekki trúað að það væri hægt að búa til bjór með svona slungnu bragði.

Þegar hér var komið sögu voru bjórarnir á smakklistanum búnir. Kalli var hins vegar kominn í ham og kom með bjór sem ég man ekki hvað heitir (gleymdi smakknótunum mínum á sófaborðinu). Svona af svipuðum klassa og Orvalinn og Chimayinn.

Þetta var alveg snilldarkvöld og fyrir mér opnaði þetta alveg nýjar víddir. Sérstaklega hvað varðar belgísku bjórana. Takk kærlega fyrir mig.

Afmæli

2006-12-11T17:49:00.000Z

Þetta er svona það næsta, sem ég kemst bloggafmælisdeginum. Byrjaði að blogga 10. desember í fyrra. Var þá ekki búinn að ákveða að blogga bara á prímtöludögum.

Nýi

2006-12-05T22:08:00.000Z

Bond er bara drullugóður. Ég verð að viðurkenna að ég bjóst ekki við miklu en þetta fór langt fram úr mínum björtustu vonum. Fórum semsagt við hjónin og unglingurinn á Bond um helgina.
Held að við höfum ekki farið í bíó (þ.e.a.s. ég og Hildigunnur) síðan við fórum á Incredibles fyrir einu og hálfu ári og þar áður á Hringadrottinssögu.

Mikið

2006-12-05T22:02:00.000Z

varð ég glaður þegar ég frétti að dönsku fréttamennirnir, sem voru sóttir til saka fyrir að vinna gegn hagsmunum þjóðarinnar (eða einhverjar álíka gáfulegar sakir), hefðu verið sýknaðir. Það eina sem þeir gerðu var að birta frétt, sem var byggð á gögnum sem var lekið úr dönsku leyniþjónustunni, um að forsætisráðherrann lygi þegar hann sagði að vitað væri að gereyðingarvopn væru í Írak.

Spennandi

2006-12-05T21:51:00.000Z

listaverkasýning fram undan. Þar verða meðal annars sýnd verk eftir Matisse og Renoir. Hlakka samt mest til að sjá Kokoschka. Verður opnuð 15. des. Bíð spenntur!

Helgin

2006-11-29T23:02:00.000Z

Maður sér nú bara sína sæng upp reidda! Sé næstu vinnuviku í hillingum (næstum). Miðað við þetta

Rakst

2006-11-23T22:09:00.000Z

svo á þennan gagnslausa fróðleik í Fréttablaðinu í morgun:

Vissir þú ...
að Smold Schonberg þjáðist af triskaidecfobia sem er sjúkleg hræðsla við töluna þrettán. Hann dó þrettán mínútur yfir tólf föstudaginn þrettánda.

Örblogg

2006-11-23T22:07:00.000Z

Held að öll mín blogg þessa dagana séu örblogg.

Snjór

2006-11-19T23:30:00.000Z

Ekki smá sem snjóaði í nótt. Allt á kafi. Ég þurfti að fara í Kópavog í morgun til að sækja bílinn okkar. Vorum í afmæli þar í gær. Tók strætó og var 1 og 1/2 tíma fram og til baka.

Tannleysingi

2006-11-17T22:43:00.000Z

Finnur var að missa fyrstu tönnina í dag. Var voða stoltur þegar ég kom heim. Verst að tönnin losnaði í skólanum og týndist.

Að lokum erum við hætt

2006-11-11T19:19:00.000Z

með rannsóknina okkar. Höfum núna í mánuð safnað saman öllum miðum vegna matarinnkaupa. Þannig að við vitum hvað fer mikið í mat hjá okkur núna á mánuði. Planið er svo að taka annan mánuð til samanburðar eftir að matarskatturinn verður lækkaður. Verður spennandi að sjá hvernig það kemur út.

Líka hættur

2006-11-11T19:13:00.000Z

að hjóla í vinnuna. Hef hjólað svona að meðaltali þrisvar í viku í vinnuna síðan í maí. Nú er hins vegar orðið svo dimmt á morgnana að ég er hættur í bili. Nenni heldur ekki að fara að setja nagladekk á hjólið. Tek upp þráðinn að nýju í febrúar eða mars. Þangað til er það bara sá guli úr og í vinnu.

Hættur

2006-11-11T19:09:00.000Z

að blogga rétt fyrir eða eftir miðnætti á bloggdögum. Búinn að lenda svo oft í því upp á síðkastið að færslan lendir ekki á réttu dagsetningunni.

2006-11-07T21:56:00.000Z

Þessa dagana finnst mér alltaf eins og það sé komin helgi þegar ég er búinn í skólanum á miðvikudögum. Á mánudögum og miðvikudögum er skólinn til hálfellefu og á þriðjudögum er fótboltinn. Alveg búinn þegar ég kem heim á þessum dögum.

Náði

2006-11-06T00:00:00.000Z

meira að segja að taka eitt létt skokk í dag. Þó það væri rok þá var það samt skárra en í gær. Bleytan þá maður minn. Skokkgallinn var níðþungur eftir það ævintýri.

Matarboð

2006-11-05T22:30:00.000Z

Fórum í matarboð til Imbu frænku í gærkvöldi. Að venju var þetta allt saman mjög glæsilegt og girnilegt. Eftirrétturinn sló síðan allt annað út sem boðið var upp á. Imba þú verður að láta okkur fá uppskriftina, þessi kaka er alveg geggjuð! Takk síðan fyrir snilldarkvöld.

Aumingjabloggari

2006-11-05T00:35:00.000Z

Ég er að breytast í aumingjabloggara. Gleymdi bloggdegi um daginn. Og nú missti ég af bæði 2. og 3. Þetta nær náttúrlega ekki nokkurri átt!

HNE

2006-10-31T23:57:00.000Z

Freyja fór til HNE læknis í dag. Í fyrsta skipti í ég veit ekki hvað langan tíma var allt í sóma með eyrun hennar. X putta.

Sætt

2006-10-31T23:51:00.000Z

Fátt sem er sætara en að jafna í fótboltanum með flautumarki. Verst að við komum okkur sjálfir í þá stöðu að þurfa að jafna. Vorum búnir að vera yfir nánast allan leikinn en glutruðum forystunni niður á lokamínútunum.

Google Earth

2006-10-28T23:59:00.000Z

Vá. Ekkert smá sem Google Earth er flott forrit. Var að uppgötva að ég get flutt skrár af Garminum mínum (reyndar eftir smá krókaleiðum. Þarf að breyta sniðinu á XMLinu sem hlaupagræjan skilar frá sér yfir á eitthvað KML snið sem Google skilur) inn í Google Earth. Þá er hægt að sjá hlaupaleiðina á kortinu. Geexla kúl!

Gleymska

2006-10-23T23:41:00.000Z

Mér er nú ekki við bjargandi. Gleymdi síðasta bloggdegi. Mundi ekki eftir því fyrr en daginn eftir.

Annars tók ég því frekar rólega í gær. Þó að ástandið eftir árshátíðina hefði verið ótrúlega gott (náði meira að segja að fara í aukatíma í C# námskeiðinu kl. 10 (ok, ok ég mætti reyndar ekki fyrr en 10:30)) þá var nú samt mjög gott að leggjast upp í sófa og horfa á formúluna.

Adrenalíngarðurinn

2006-10-17T23:27:00.000Z

Ég fór ásamt deildinni minni í Adrenalíngarðinn á laugardaginn. Hinn árlegi haustfundur upplýsingadeildar. Til að berja mannskapinn saman þá er alltaf farið í eitthvað svona útivistardæmi. Í fyrra var það rafting, í ár Adrenalíngarðurinn.

Veðrið var alveg ömurlegt, hávaðarok og rigning. Þannig að það var ekki hægt að fara í nema hluta af tækjunum. Við fórum í 3 mismunandi tæki. Fyrst var það klifurveggurinn. Hefði líklega ekki verið neitt sérstaklega erfiður nema útaf veðrinu. Innan við helmingur komst upp á topp (skrifstofublækur hvað). Einn í minni línu lenti í því að fjúka útfyrir klifurvegginn á leiðinni niður. Hann spyrnti sér heldur hraustlega frá veggnum um leið og kom vindhviða. Fékk víst einhverja marbletti við þá lendingu. Síðan átti að klifra upp staur og standa svo uppi á honum. Vegna hvassviðrisins voru ekki nema örfáir sem náðu því. Flestir fuku niður þegar átti að taka síðasta skrefið. Að lokum var svo farið í risaróluna. Það var náttúrlega ekki hægt annað en að fara á hvolfi í hana. Mjög sérstök sýn á landið að dingla svona á hvolfi í 10 m rólu.

Þreyttur

2006-10-11T23:58:00.000Z

Ekki smá sem þetta er erfitt, þessi kvöld sem ég er á námskeiðinu. Ekki nóg með að þurfa að hugsa í vinnunni heldur líka eftir kvöldmat.

Sá svo eina snilldarfrétt í Fréttablaðinu, held ég frekar en blaðinu, í gær eða fyrradag. Hún fjallaði um skemmdarverk á bíl gott ef það var ekki á Selfossi. Í lokin var sagt að framrúða í bílnum hefði verið eyðilögð talsvert!

Í

2006-10-07T23:56:00.000Z

Held að þessi forsetning sé deyjandi. Maður heyrir varla lengur fólk segja í mörg ár. Alltaf til margra ára. Mér finnst þetta synd.

Bollafjall

2006-10-05T23:57:00.000Z

Fréttablaðið var nokkuð gott í dag.

Í fjárlagafrumvarpinu nýja höfðu menn slysast til að kalla Bolafjall Bollafjall. Einhver fréttamaður hafði greinilega rekið augun i þetta og skrifaði smápistil um þetta. Í lokin á pistlinum var síðan gert stólpagrín að þessu:

„Kannski fáum við Herðabreið, Engil, Fantafell, Lessuhorn og Hvaladalshnúk í næstu fjárlagafrumvörpum. Hver veit?“

Hildigunnur

2006-10-03T23:58:00.000Z

er náttúrlega búin að telja upp nokkur helstu atriði úr Parísarferðinni hér.

Man svo eftir nokkrum atriðum í viðbót.

Mér fannst merkilegt að sjá hvað var lítill hundaskítur í París núna miðað við þegar við vorum þar síðast (fyrir 15 árum). Áður þurfti maður bókstaflega að fylgjast með hvar stigið var niður. Núna sást hundaskítur aðeins stöku sinnum.

Endurnýjaði kynnin við maltbjórinn Pelforth brune. Svakalega góður bjór.

Fann svo flottustu vínbúð, sem ég hef á ævinni komið inn í. Lavinia á Rue de la Madeleine. Slær svei mér þá Berry Bros í London við. Berry Bros eru þó með flottari heimasíðu.

Að síðustu ísinn í Berthillion.

Síðasta

2006-09-23T23:58:00.000Z

umferðin í úrvalsdeild karla spiluð í dag. Mínir menn (Baslmenn) spiluðu við KR og þurftu endilega að missa leikinn niður í jafntefli á síðustu sekúndum leiksins. Grr. Þýddi að KRingar náðu að stela öðru sætinu af okkur. Grr.

Eyrnavesen

2006-09-19T23:29:00.000Z

Freyja greyið er að fara í eyrnaaðgerð í fyrramálið. Öfug röraðgerð. Það þarf að taka rör, sem losnar ekki af sjálfu sér. Einhver ofholdgun, sem heldur því föstu.

Svefnmeðal

2006-09-19T23:26:00.000Z

Horfði á enska boltann í gærkvöldi. Svo sem ekki í frásögur færandi í sjálfu sér. En ég steinsofnaði undir þættinum. Þetta er í þriðja skipti í röð sem það gerist.

Spurningin er hvort það er röddin í Bjarna Fel. sem er svona svæfandi eða hvort það er boltinn?

Eggjakast

2006-09-17T23:48:00.000Z

Haldið þið ekki að það hafi ekki verið grýtt eggi á húsið okkar í fyrrinótt!

Veit ekki hvort menn eru farnir að taka með sér eggjabakka á djammið. Allavega hafði einu eggi verið hent á húsið okkar þegar ég kom út í gærmorgun. Rétt hjá var svo tómur eggjabakki.

Einhvern veginn finnst mér þetta verra heldur en ef að hefði verið krotað á húsið. Þetta er mun persónulegra ef svo má að orði komast.

Námskeið

2006-09-13T23:37:00.000Z

Ég fer hvorki á ítölsku né frönskunámskeið á þessari önn. Hins vegar bauðst mér að fara á .Net og C# forritunarnámskeið í boði vinnunnar (Hildigunnur kallar það Cís námskeið). Alvörunámskeið. Tvisvar í viku 3 tímar í senn. Byrjar á mánudaginn og stendur í 3 mánuði. Þetta var tækifæri sem ég gat ekki sleppt.

Veit hvað ég verð að gera í haust.

Finnur

2006-09-11T22:05:00.000Z

Skutlaði Finni í skólann á föstudaginn á bílnum. Þegar við vorum komnir í skólann þá ætlaði ég að fylgja honum inn í stofuna. Við vorum ekki komnir langt frá bílnum þegar Finnur sagði: „Þarft þú ekki að fara aftur í bílinn pabbi?“

Greinilega ekki það svalasta að vera fylgt að stofunni af pabba sínum...

Capacent

2006-09-07T23:06:00.000Z

var það heillin. Nýja nafnið á IMG mannafli liðsauka. Er ég einn um að finnast þetta hallærislegt? Fyrir utan að þýða ekki neitt og segja ekki neitt um starfsemina (svona svipað og þegar breski pósturinn varð að Accenture), þá er ekki nokkur leið að muna það.
Skil þó reyndar vel að ákveðið hafi verið að skipta um nafn. IMG mannafl liðsauki, ekki beint þjált.

Ákvörðun

2006-09-05T23:39:00.000Z

Er að bræða með mér hvort ég eigi að taka mér pásu í ítölsku og fara kannski að hressa upp á frönskuna í staðinn...

Utan við mig

2006-09-05T23:29:00.000Z

Var frekar utan við mig á síðasta bloggdegi. Settist við tölvuna vel fyrir miðnætti þann þriðja. Skrifaði eitthvað smávegis en var ekki búinn að gefa neitt út. Síðan fór ég að skoða eitthvað á netinu, man ekki einu sinni hvað. Næst þegar ég leit á klukkuna þá var hún orðin 00:00:10. Garg! Ekki einu sinni hægt að redda þessu með Fibonacchi svindli...

Brúarhlaup frh.

2006-09-02T22:13:00.000Z

Hljóp 1/2 maraþon í Brúarhlaupinu í morgun. Þetta varð ekki eins skemmtilegt og ég var búinn að vonast eftir.

Þegar ég lagði af stað austur á Selfoss var nánast logn hér í Reykjavík. Ekki á Selfossi. Þegar ég kom þangað var stíf norðaustan átt. Ég vissi það strax og ég steig út úr bílnum að allar vonir um góðan tíma væru úr sögunni. Þá að hlaupinu: Fyrstu 12,5 km gengu reyndar mjög vel. Enda undan vindi að mestu leyti. Millitími á 10 km 41:16, sem var meira en mínútu betri tími en ég hljóp 10 km á í brúarhlaupinu í fyrra (n.b. ég hélt aftur af mér vegna þess að ég vissi að bakaleiðin yrði erfið). Síðan var snúið við á leiðinni til Stokkseyrarbakka eftir 12,5 km. Millitími u.þ.b. 51 mín. Eftir það var hlaupið á móti vindi. Í stuttu máli sagt þá tók mig jafn langan tíma að hlaupa síðustu 8,5 km og fyrri 12,5 km. þ.a. ég endaði á 1:41:58. Við erum að tala um 12 mínútur frá markmiðinu. :-(

Ástæðan fyrir því að ég kláraði var að þegar var snúið við, var ég eins langt frá Selfossi og hlaupið fór, einhvern veginn varð ég jú að komast í bílinn aftur!?

Brúarhlaup

2006-09-01T00:21:00.000Z

Var svo að skrá mig í 1/2 maraþon í Brúarhlaupinu á Selfossi, sem verður haldið á laugardaginn. Markmiðin ekki gefin upp nákvæmar en það að stefnt er á bætingu...

1. september

2006-09-01T00:10:00.000Z

Ég veit, ég veit. 1. er ekki prímtöludagur. Var bara eitthvað að vesenast og svo var klukkan orðin rétt rúmlega miðnætti. Tek bara Fibonacchi á þetta að þessu sinni.

Pantaði í dag Litlafellið, bát sem siglingaklúbbur Samskipa á, fyrir sunnudaginn. Ætlum að fara í smá siglingu og aðeins að kíkja á sjóstöng. Bara vonandi að spáin rætist.

Sæbrautin

2006-08-23T23:00:00.000Z

Ég er hræddur um að það sé klúður í uppsiglingu þar sem verið er að færa Sæbrautina. Fyrst leist mér vel á þessar framkvæmdir því mér sýndist að ætti að sameina tvenn umferðarljós með nokkurra metra millibili (við Laugarnesveg og Klettagarða). Nú get ég ekki betur séð en eigi að halda þeim báðum. Ekki nóg með það. Búið er að bæta við einum algerlega óþörfum ljósum við höfuðstöðvar Glitnis. Þetta minnir bara helst á klúðrið hjá umferðarbrúnni yfir Hringbrautina.

Það verður líka spennandi að sjá hvort eitthvað verður gert til að auðvelda gangandi og hjólandi vegfarendum lífið á þessu svæði. Stígurinn, sem þarna hefur verið endaði fyrirvaralaust rétt hjá Klettagörðum.

Vínuppboð

2006-08-19T20:21:00.000Z

Við Hildigunnur skelltum okkur áðan á vínuppboð Glóbuss, sem haldið er í tilefni af menningarhátíð. Þarna voru ýmis spennandi vín boðin upp. Við buðum í nokkrar flöskur og Hildigunnur nældi í eina flösku af chablis frá einum af uppáhalds framleiðendunum okkar. Hin vínin enduðu öll á hærra verði en við vorum tilbúin að borga.

Fyrir tveimur árum fórum við á sama uppboð og þá sat fyrir framan okkur kona, sem fór algerlega á taugum þegar hún bauð í eitthvað. Hún lenti meðal annars a.m.k. tvisvar í að yfirbjóða sjálfa sig! Ég hélt nú ekki að það væri hægt að vera kvikari með spjaldið heldur en þessi kona. En viti menn. Í röðinni fyrir framan okkur áðan var karl, sem sló þessari fyrir tveimur árum rækilega við. Í eitt skiptið bauð hann í flösku. Boðin hljóðuðu eitthvað á þessa leið: 5000, spjaldið upp 5300, spjaldið aftur upp 5500 spjaldið enn einu sinni upp 5800 slegið. Ég gat ekki séð að neinn annar byði á móti honum í þessi fjögur skipti. Þetta var ekki í eina skiptið, sem hann lenti í að yfirbjóða sjálfan sig. Að lokum þá benti Einar Thoroddsen, uppboðshaldari, honum á að hann væri að yfirbjóða sjálfan sig. Spurning hvort hann hafi haldið að þetta væri blævængur en ekki uppboðsnúmer.

Sudokur

2006-08-17T22:53:00.000Z

Ekki smá sem sudokurnar eru erfiðar í Fréttablaðinu þessa dagana. Ég hef verið að kíkja á þær að undanförnu í fríinu. Get ekki séð að það sé alltaf hægt að leysa þær nema að giska á tölur í sumum tilvikum (þegar ég er búinn að fylla út allt sem hægt er og skoða svo alla reiti, sem eftir eru með tilliti til þess hvaða tölur geti komið þar fyrir). Nema það sé eitthvað trikk við lausnirnar sem ég kann ekki.

Úrvinda

2006-08-13T23:07:00.000Z

Ég var of þreyttur til að blogga í gær en tímdi samt ekki að missa af bloggdeginum. Þannig að ég tók frá smá pláss. Fékk síðan þessa ömurlegu magapest í nótt (örugglega það sama og Finnur var með í fyrradag og svo aftur í morgun). Er bara rétt að skreiðast á fætur núna :-(
Þetta þýðir líka að ég er hættur við að hlaupa í Reykjavíkurmaraþoni um næstu helgi. Ekkert gaman að hlaupa ef maður er ekki í toppformi. Grrr...
En að öðru jákvæðara. Við kláruðum undirvinnuna fyrir nýju stéttina í gær. Búin að vera svakaleg törn. 3 dagar í mokstur og svo lokasnurfus í gær. Feginn að þetta er búið í bili. Handleggirnir á mér eru líka fegnir, þvílíkar harðsperrur, sem ég er með.

Öllu lendir maður nú í...

2006-08-11T23:39:00.000Z

Þeir sem lesa bloggið hennar Hildigunnar eru eflaust búnir að heyra af dramanu, sem ég lenti í í gær. Við erum semsé að skipta um jarðveg fyrir nýja stétt. Áttum von á gámi í gær fyrir jarðveginn og vorum búin að taka frá 3 stæði + eitt sem er ekki merkt sem stæði en samt alltaf nýtt sem slíkt. Nema hvað, svona hálftíma áður en bíllinn með gáminn kom þá stoppar jeppi fyrir framan hjá okkur. Út úr bílnum kemur maður og ýtir til hliðar stól sem var í stæðinu og sest inn í bíl. Ég þaut út til að útskýra fyrir honum að við þyrftum að nota stæðin undir gám sem væri á leiðinni og það væri ekki hægt að koma honum fyrir ef lagt væri í þetta stæði. Gaurinn lét eins og hann heyrði þetta ekki og byrjaði að mjaka sér inn í stæðið. Þá stillti ég mér upp fyrir framan bílinn til að stoppa hann. Þá gerði hann sér lítið fyrir og ók á mig! Ekkert mjög fast reyndar en þó þannig að ég hrökklaðist til baka. Ég varð alveg fokvondur (gerist ekki oft) reif upp hurðina og hellti mér yfir þennan vitleysing. Hann var samt ekkert á því að láta sig, tönnlaðist á því að Reykjavíkurborg ætti þessi stæði og hann mætti alveg leggja í þau (sem er í sjálfu sér alveg rétt en aðstæður hér í miðbænum eru bara þannig að ekki er hægt að koma svona gámi fyrir nema í bílastæðum). Hins vegar eftir að ég hafði hringt á lögguna og Gunnar nágranni okkar blandaði sér í rifrildið þá lét gaurinn undan síga. Það síðasta sem hann sagði var: „Ég get svosem farið“. Eins gott að maður lendir ekki oft í svona fírum.

2006-08-07T23:41:00.000Z

Vorum með matarboð í gær. Í sjálfu sér ekki í frásögur færandi nema að við vorum með
þennan forrétt, sem sló algerlega í gegn.
Við höfðum gert hann einu sinni áður. Hann er talsvert vesen (sérstaklega ef maður býr til pastað sjálfur en það er eiginlega samt nauðsynlegt) en þvílíkt þess virði.

Klikkaði

2006-08-03T23:39:00.000Z

grjóthausinn ég fór út að skokka áðan. 1:06:25 er ekkert alveg glataður tími á 15 km. Veðrið var reyndar ekkert sérstaklega hagstætt rigndi allan tímann. Man ekki hvenær ég var síðast svona gegnvotur. Var þess vegna frekar feginn að hafa hætt við að skrá mig í Vatnsmýrarhlaupið. Mætti keppendum sem voru að reyna að hita sig upp þegar ég var að klára hringinn, litu ekkert sérlega vel út.

Sumar

2006-08-03T23:27:00.000Z

og blogg og ég fara greinilega ekki vel saman. Er búinn að missa af fullt af bloggdögum af einskærri leti. Þetta lagast vonandi með haustinu.

Týndur gutti

2006-07-29T23:24:00.000Z

Finnur gerði okkur alveg dauðskelkuð í dag. Hann fékk að fara út í sjoppu hérna rétt hjá einn til að kaupa nammipoka. Eftir svona 20 mínútur og gaurinn ekki kominn til baka þá vorum við orðin frekar hissa á þessu. Hildigunnur fór út að svipast um eftir honum. Enginn Finnur. Hann hafði hins vegar komið í sjoppuna og keypt nammipoka. Við bæði af stað til að leita. Leituðum út um allt í næsta nágrenni. Enginn Finnur. Síðan hringdi Hildigunnur í alla félagana af leikskólanum (nema einn kom í ljós). Enginn Finnur. Nú var liðinn meira en klukkutími og við vorum orðin frekar stressuð yfir þessu. Hringdum í lögguna til að tilkynna hvarfið. Þá fór Hildigunnur aftur út og rakst þá á piltinn þar sem hann var á leið út úr húsi rétt hjá okkur. Þá hafði hann rekist á félaga úr leikskólanum, sem var í heimsókn hjá frænku sinni hérna rétt hjá. Við höfðum að sjálfsögðu ekki hugmynd um þau tengsl. Þar að auki var nafnið hans ekki í símaskránni frá leikskólanum því hann hafði komið inn eftir að hún var gefin út. Okkur var þokkalega létt!

Bílaraunir

2006-07-13T23:34:00.000Z

Það er slæmt þegar maður kann orðið númerið hjá bílaverkstæðinu sínu utanað :-(

Og já ég ætlaði að vera í fríi. Get greinilega ekki haldið mér saman.

Ritstífla

2006-07-11T23:53:00.000Z

Nú er ég alveg hættur að nenna að blogga í bili. Farinn í bloggfrí a.m.k. út júlí. Ekki nema þá að mér detti eitthvað eitursnjallt í hug.

Frakkar

2006-07-06T00:01:00.000Z

komnir í úrslit. Jibbí, áfram mínir menn.

Dagsetning

2006-07-06T00:00:00.000Z

Eitthvað hefur nú klukkan verið að stríða mér við síðasta blogg. Var nú reyndar að skrifa þetta rétt fyrir miðnættið, en það var ekki kominn 4. Að minnsta kosti ekki skv. klukkunni á tölvunni minni. O jæja ekki eins og þetta skipti miklu máli.

Formúlan

2006-07-04T00:01:00.000Z

Þetta er bara að breytast í eitthvað íþróttablogg hjá mér.
Formúlukeppnin í gær var alveg örugglega sú leiðinlegasta á árinu. Hjálpaði náttúrlega ekki að McLaren náði ekki að keyra einn einasta hring. Schumi vann öruggan sigur. Ég held nú að þetta hafi lítið forspárgildi fyrir framhaldið. Hef nefnilega á tilfinningunni að Michelin hafi mætt með mjög örugg en um leið hæg dekk út af skandalnum í fyrra. Segir nú sitt að Toyota sé að berjast um pallsæti...

Seint í rassinn gripið

2006-07-03T23:58:00.000Z

Ætla samt að lýsa ánægju minni með að Frakkar (mínir menn) skyldu leggja Brassana á laugardaginn. Ég ætlaði að skrifa um þetta í gær en var svo þreyttur að ég orkaði það bara ekki.

Klukk

2006-07-02T23:06:00.000Z

Alveg rétt. Hildigunnur klukkaði mig fyrir langalöngu. Svo gleymdi ég að svara klukkinu 23. júní og bloggaði ekki neitt 29. þ.a. það er ekki fyrr en nú sem ég get svarað þessu.

1. Hvaða bók hefur haft mest áhrif á þig?
Þokkalega erfið spurning. Man ekki eftir neinni einni sérstakri.

2. Hvernig bækur lestu helst?
Það er nú svona ýmislegt. Ég er alltaf með nokkrar bækur í gangi í einu. Finnur kallar þetta að lesa röndótt. Ég er nánast alltaf að lesa 1 til 2 reyfara. Því til viðbótar eru þá alls konar bækur: Tæknibækur, tímarit, handbækur, ferðabækur...

3. Hvaða bók lastu síðast?
Síðasta bók, sem ég kláraði var Striptease eftir Carl Hiaasen. Bækurnar á náttborðinu núna eru síðan: Crossbones eftir Kathy Reichs og Ástríkur í Bretalandi (á ítölsku reyndar). Var svo rétt áðan að byrja að lesa bók um viskí, Single Malt & Scotch Whisky eftir Daniel Lerner. Svo er ein bók sem ég er að þræla mér í gegnum: Cryptography, Theory and Practice eftir Douglas R. Stinson. Góð bók en erfið. Sé fyrir mér margra mánaða verkefni.

Stofnanahremmingar

2006-06-23T20:15:00.000Z

Lenti í undarlegum samskiptum í gær við ákveðna stofnun hér í bæ.

Forsagan er sú að við þurfum að senda ákveðnar skrár til þessarar stofnunar. Í fyrradag hafði samband við mig samstarfsmaður minn og vildi fá mig til að athuga um tvær slíkar skrár, sem kæmust ekki til skila. Ég skoða málið og sé að skrárnar hafa farið frá okkur en ekki verið samþykktar hjá stofnuninni af ástæðum, sem ég vissi ekki hverjar væru. Þannig að ég fer inn á vef stofnunarinnar og skrifaði niður lýsingu á vandamálinu. Þetta var í lok vinnudags í fyrradag.

Í gær var síðan komið svar:

Þú verður að láta okkur hafa sendingarnúmer.

Ég svaraði:
Ég er búinn að finna hvað var að annarri skránni en sendingarnúmerin í hinni eru x, y og z.

Nokkrum mínútum síðar kom svar:
Fyrst þú ert búinn að finna út úr þessu þá skaltu bara endursenda skrárnar.

Ég:
Er búinn að endursenda skrána, sem ég var búinn að finna út hvað var að. Sendingarnúmerin í hinni eru x, y og z.

Nokkrum mínútum síðar kom svarið:
Ef þú átt í vandræðum þá skaltu frekar hringja í okkur.

Nú var ég farinn að verða svolítið pirraður en hugsaði: Allt í lagi ef hann vill frekar að ég tali við hann í síma þá það.

Þannig að ég hringdi í hann og samtalið var efnislega á þessa leið:

Ég:
Góðan daginn. Ég er að hringja út af skrám, sem við erum búnir að vera í tölvupóstsambandi um...

Hann:
Já einmitt. (blaðar eitthvað hjá sér) Þetta er örugglega vegna þess að brottförin er ekki rétt skráð. Hvernig er þetta kannt þú ekkert á þetta?

Ég (frekar hvumsa):
Tja ég skráði þetta nú ekki. Ég er bara að reyna að leysa þetta mál. Skrárnar fóru frá okkur en stöðvast hjá ykkur.

Hann:
Já það er nú örugglega allt í lagi hjá okkur. Eru þetta kannski ungar stúlkur sem skráðu þetta hjá ykkur?

Ég:
Flýtti mér að ljúka samtalinu svo ég myndi ekki hreyta einhverju í hann.

Því er svo við þetta að bæta að málið leystist að lokum án „aðstoðar“ þessa manns. Þess má geta að ástæðan fyrir veseninu lá hjá stofnuninni.

Kvart

2006-06-19T23:49:00.000Z

Þetta veðurfar í júní hér á höfuðborgarsvæðinu er búið að vera frekar pirrandi. Einn dagur af 19 þar sem hefur ekki rignt neitt. Sýndist samt á mbl kortinu í dag að þetta gæti kannski farið að skána. Að minnsta kosti voru einhver gul tákn á því, sem hafa ekki sést lengi.

Snilld, snilld, snilld

2006-06-17T21:55:00.000Z

Loksins náðum við að slá Svíþjóð út í alvöruleik. Það hefur víst ekki gerst síðan 1964 og þýðir að Svíar eru ekki með á HM í fyrsta skipti frá upphafi. Kominn tími á það, þótt fyrr hefði verið.
Leikurinn áðan var þvílíkur háspennuleikur. Bæði lið klúðruðu eins og þeim væri borgað fyrir. Mér var nú ekki farið að lítast á blikuna um miðjan síðari hálfleikinn þegar Svíar voru búnir að ná 5 markaforskoti og þeir inni á HM. Okkur tókst þá að snúa leiknum og jafna og halda síðan út. Þegar voru svo 5 mínútur eftir hélt ég að dómararnir ætluðu að gefa Svíunum þetta á silfurbakka þegar við fengum þrjá brottrekstra á fáeinum sekúndum. En sem betur fer tókst strákunum að þrauka þann kafla.
Ótrúlega sætt. Við að fara á HM á kostnað Svía. Þetta jafnar út vonbrigði gegn Svíum mörg ár aftur í tímann.

2006-06-17T10:46:00.000Z

Hildigunnur fann þessa mynd einhversstaðar á netinu. Þvílík snilld. Þetta hlýtur að vera skilti fyrir framan bílastæði á eðlisfræðideild einhvers háskólans.

Niðurdrepandi

2006-06-13T21:48:00.000Z

fréttir í útvarpinu áðan. Við Hildigunnur vorum að koma úr búð og í útvarpsfréttunum var hver fréttin annarri ömurlegri og meira niðurdrepandi. Ísraelar að sprengja fólk í tætlur á baðströnd. Bush og Írak. Sjálfstæðisflokkurinn og Framsókn að taka við borginni. Eftir þriðju eða fjórðu svona fréttina þá sagði Hildigunnur: „Maður fer bara í vont skap af því að hlusta á þetta“. Sem var nákvæmlega það sama og ég hafði verið að hugsa...

Formúlan

2006-06-11T23:48:00.000Z

Ekkert sérstaklega skemmtileg keppni í morgun. Þó eru batamerki á mínum mönnum. Kimi varð 3. eftir að hafa verið í öðru sæti meirihluta keppninnar. Himinn og haf frá Barcelona þar sem hann varð 5. og átti aldrei möguleika á neinu meira. Bara vonandi að þeir haldi áfram á þessari braut.

Svíagrýlan

2006-06-11T23:01:00.000Z

Sá svona búta úr leiknum við Svía í dag. Skemmtileg tilbreyting að sjá þá fara á taugum og klúðra leiknum á síðasta korterinu. Yfirleitt hefur þetta verið á hinn veginn. Svo er bara að vona að við náum að halda þessu um næstu helgi.

Síðar

2006-06-05T21:53:00.000Z

Nú aðeins um Danmörku:
Varð bæði fyrir vonbrigðum og ánægður með ástandið á bjórmálum í Danmörku. Það sem var ánægjulegt var að á síðustu 3-4 árum hafa sprottið upp smábrugghús út um alla Danmörku. Afleiðingin er sú að úrvalið hefur aukist gífurlega. Í staðinn fyrir að bara fengust grøn og hof, einhverjir discount bjórar eins og Harboe og svo gullbjórar frá Carlsberg og Tuborg þá fást núorðið ótal tegundir. Gallinn er bara sá að verð á bjór í Danmörku er fáránlega hátt. Víðast 40-50 Dkk fyrir bjór í miðbænum. Þetta er bara sama verð og hér hjá okkur. Og Danmörk er í Evrópusambandinu!
Bestu bjórarnir, sem ég smakkaði í Danmörku:
Stout frá Bryghuset Svaneke á Borgundarhólmi, porter á Obelix og hof á Gammel kongevej 90. Þar tekur a.m.k. 10 mínútur að láta renna í eitt glas.
Verstu bjórarnir:
Grøn og grøn. Þann fyrri fékk ég á Hvids vinstue og þann síðari eftir að ég gleymdi að tékka á hvaða bjórar voru í boði á veitingastað, sem við borðuðum á. Þau mistök voru ekki gerð aftur. Að nokkur skuli geta drukkið þetta sull. Vont meira að segja úr krana.
Mestu vonbrigðin:
Að missa af dökka Budweisernum, sem Hildigunnur fékk á Charlie's. Leitaði að þessum bjór dyrum og dyngjum í Prag en fann ekki. Sérstaklega vegna þess að Time out bókin um Prag sagði eitthvað á þá leið að þetta væri snilldarbjór, bara ef maður fyndi hann. Meira að segja bjórsalinn á Jilská átti hann ekki (a.m.k. ekki þegar ég kom til hans). Hann sneri samt öllu við í leit að honum, hélt hann ætti eitthvað af honum.

Pragferð

2006-06-03T23:59:00.000Z

Til þess að átta sig á því hvað við hjónakornin vorum að vesenast síðustu vikuna er kannski ágætt að kíkja á síðuna hennar Hildigunnar þar sem Danmerkur og Pragferð okkar er rakin í stórum dráttum.

Á meðan Hildigunnur og aðrir kennarar í Tónlistarskóla Hafnarfjarðar skoðuðu hinar ýmsu tónlistarstofnanir Pragborgar þá þurftum við Jón Heiðar að hafa ofan af fyrir okkur með einhverjum hætti. Það er skemmst frá því að segja að við örkuðum miðbæinn þveran og endilangan. Það náttúrlega segir sig sjálft að mann þyrstir af miklum göngum. Við Jónarnir þurftum því að koma reglulega við á ölstofum til að svala þorsta okkar.
Þeir staðir sem stóðu upp úr voru:
U Fleku: Þar fær maður mjög góðan dökkan bjór, sem er bruggaður á staðnum. Ég las einhvers staðar að þetta væri elsta brugghús þar sem bjórinn er drukkinn á staðnum (microbrewery). Sel það ekki dýrara en ég keypti. Gallinn er hins vegar sá að bjórinn er hrikalega dýr þarna miðað við tékkneskar aðstæður (87,5 Tkr, sem samsvarar um 300 Íkr. Hljómar kannski ekki mikið en víðast annars staðar í miðbænum fást bjórarnir á 50-60 og um leið og er komið aðeins út fyrir mestu ferðamannastaðina fara þeir í 25-30). Þar að auki skilst mér að maður þurfi að fara vel yfir reikninginn því þjónarnir reyni að troða inn á mann Becherovka skotum (sem smakkast eins og fljótandi piparkökur). Talningin á þessum skotum er víst ekki alltaf í sama talnabasa og við eigum að venjast.
Strahov klaustrið: Þar fengum við dökkan bjór úr smábrugghúsi, sem mér fannst vera sá besti í ferðinni. Ólíkt flestum öðrum tékkneskum bjórum þá var þessi sterkur (örugglega vel yfir 5%). Eins og með marga góða bjóra og vín var fyrsti sopinn svolítið hrjúfur en bjórinn batnaði með hverjum sopa.
Á götunni Jilská, sem liggur út frá aðaltorginu fann ég bjórbúð með mjög fínu úrvali. Þar fann ég dökkan bjór, Bernard, sem ég sá ekki á neinni krá. Mjög góður bjór, sem mér fannst komast næst Strahov bjórnum. Þar keypti ég líka Krušovice dökkan, sem ég var fyrir vonbrigðum með. Þriðji dökki bjórinn, sem ég fékk í þeirri búð var Staropramen, ágætis bjór.
Prófaði síðan 3 mismunandi útgáfur af Krušovice (á öldurhúsi rétt hjá aðaltorginu). Venjulegur 10° Krušo var alveg ágætur. Sá dökki olli vonbrigðum. Þriðja týpan, 11°, Muškatýr, var hins vegar langbest. Ég náði ekki að smakka fjórðu týpuna, sem var 12°. Þessi krá var ein af fáum þar sem hægt var að fá meira en 1-2 gerðir af bjór.
Ég skildi ekki alveg hvernig farið er að þessu í Tékkó. Oftar en einu sinni fengum við matseðil í hendurnar þar sem var boðið upp á nokkrar tegundir af bjór. Þegar maður ætlaði svo að panta eitthvað spennandi þá kom í ljós að staðurinn bauð ekkert nema kannski 1 tegund!
Meira síðar...

Rignir

2006-05-29T09:12:00.000Z

i København.

Ég trúi því varla

2006-05-23T23:56:00.000Z

en í ár er ég 20 ára stúdent. Gærkvöldið fór í það að hafa upp á þeim sem voru með mér í útskriftarhóp. Stefnt á einhvers konar samkomu í byrjun júní. Sjáum til hvernig það fer.